أهلا بكم فى مدونة وصفات جربتها

فى البداية احب اعرفكم بموضوع المدونة
الحقيقة فى وصفات جربتها وعجبتنى او استفدت منها سواء فى المطبخ او العناية بالشعر والبشره وحبيت انكم تستفيدو منها انتم كمان وطبعا هاقولكم على المصدر

اعتذار

السلام عليكم ورحمة الله وبركاته
اعتذر الى جميع زوار المدونة عن الانقطاع عن الكتابة الفترة الماضية
وذلك لظروف خارجة عن ارادتى
واعدكم بالعودة الى التدوين بانتظام ان شاء الله
واتمنى تلقى تعليقات منكم لمعرفة مدى رضاكم عن المواضيع

الثلاثاء، 26 مايو 2009

حلاوة الاخت رقة المشاعر

السلام عليكم ورحمة الله وبركاته
النهاردة هاقولكم على طريقة عمل حلاوة الاخت رقة المشاعر
هى كانت شرحت طريقتها على منتدى لك
من مميزات هذة الحلاوة انها تأخر نمو الشعر وتجعل الجلد ناعم مثل الحرير


المقادير :
كوب سكر
نصف كوب ماء
نصف لمونة
3 ملاعق شبة بيضاء مطحونة
نصف ملعقة مستكة مطحونة
قطعة فسوخ بحجم البندقة
ملحوظة : المستكة والشبة والفسوخ (بفتح الفاء وتشديد السين مع الضم وسكون الخاء) من عند العطار
الطريقة
ضعى المكونات ما عدا الليمون فى طاسة وارفعيهم على النار
قلبى باستمرار حتى يذوب السكر
عند بدء الغليان اضيفى الليمون
قلبى كل فترة واختبرى نضخها بوضع كمية قليلة على رخامة او طبق
وعندما تهدأ قليلا حاولى استعمالها اذا كانت جيدة اطفئى النار
وامسحى الرخامة بالماء واصبيها عليها لتهدأ قليلا ثم قومى بلمها بالمعلقة
واستخدميها كما يمكنكى الاحتفاظ بالباقى فى ورق سوليفان

ملاحظة : الاخت رقة المشاعر تقوم ببيعها من خلال منتدى لك لمن ترغب فى شرائها


التفاصيل...

الأربعاء، 20 مايو 2009

مربى البرتقال ... أكثر من رائعة

السلام عليكم ورحمة الله وبركاته
النهاردة هاقولكم على طريقة مربى البرتقال
بجد ياجماعة لازم تجربوها ...... لأنها فعلا رائعة
المقادير:
كيلو وربع برتقال يفضل البرتقال البلدى
كيلو سكر
ملعقة كبيرة عصير برتقال

الطريقة:
اغسلى البرتقال وابشرى القشر او ممكن يقشر على خفيف يعنى سيبى اجزاء من الطبقة البيضا اللى فى القشر
قطعية 4 اجزاء وازيلى البذور
قطعية شرائح رفيعة او لو عندك كيتشن اعملية بالسكينة
اضيفى السكر الى البرتقال وقلبى
اتركية فترة حوالى 8 ساعات
قومى برفع المربى على النار مع التقليب المستمر
وعند بدء الغليان اضيفى عصير الليمون
ازيلى الريم كلما ظهر حتى لا يتعكر لون المربى
اختبرى نضج المربى باخذ ملعقة مربى ووضعها فى طبق بايركس اذا تكونت قشرة رقيقة
بهذا تكون المربى قد نضجت
اتركيها حتى تهدأ وعبيها فى برطمانات جافة ونظيفة
وبالهنا والشفا
اتمنى اسمع تعليقاتكم

التفاصيل...

الأربعاء، 26 نوفمبر 2008

رستو الفخذة الضانى

الوصفة دى بقى بمناسبة اقتراب حلول عيد الأضحى المبارك
كل سنة وحضراتكم طيبين
نتكلم بقى عن رستو الفخذة الضانى
المقادير :

  1. فخذة ضانى
  2. فصوص ثوم
  3. ملح - فلفل - بهارات
  4. بصل
  5. فاصوليا بيضاء لمن يحبها

الطريقة:

  1. نحضر الفخذة وننزع معظم الدهن الذى بها او اللى بيحب الدسم زيادة ممكن يخليه
  2. نعمل شقوق فى الفخذة بمقدمة السكين نغرز بها فصوص الثوم يعنى كل شق به فص ثوم
  3. نتبلها بالملح والفلفل والبهار
  4. ثم نضعها فى صينية (اذا كنا نزعنا كل الدهن ندهن الصينية بالسمن )ونغطيها بالفويل وندخلها الفرن
  5. بعد ساعة او ساعة الاربع نخرجها ونضيف اليها البصل المقطع والفاصوليا البيضاء
  6. ندخلها الفرن مره اخرى ونتركها حتى تنضج مع تقليبها من فترة لأخرى
  7. ننزع الفويل ونتركها قليلا بالفرن حتى تتحمر

على فكرة انا ما جربتش حكاية الفاصوليا البيضاء دى انا قراتها فى الوصفة بس

بس بجد بيطلع طعمها رائع

اما عن المصدر فهو كتاب ابله عديلة عديلة عزيز يعنى

وكل سنة وحضراتكم طيبين


التفاصيل...

الاثنين، 24 نوفمبر 2008

لأيدى بيضاء وناعمة

طبعا احنا هنبدأ ندخل على فصل الشتاء
كل سنة وحضراتكم طيبين
والماية السخنة هتشتغل والنتيجة الطبيعية جفاف اليدين
طيب والحل ؟
حاجه سهلة وبسيطه ورخيصه

الليمون
وحضرتك واقفة كده فى المطبخ لما تعصرى ليمون على اى حاجه
طبعا ما حدش بيستغنى عن الليمون فى المطبخ
احتفظى بالقشر وطبعا لو خليتى فى حبة مايه ما تعصريش بذمة اوى يعنى
وبعد ما تخلصى شغل ادعكى يديكى بالقشر
هتلاقى ايدين بيضاء وناعمة
اما المصدر : الست الوالدة ربنا يخليهالى

التفاصيل...

الثلاثاء، 18 نوفمبر 2008

كيكة بالعسل الاسود والقرفة

السلام عليكم ورحمة الله وبركاته
النهاردة هنتكلم عن طريقة عمل كيكة بالعسل الاسود والقرفة
المقادير:


  1. 2كوب دقيق
  2. نصف كوب سكر
  3. نصف كوب لبن
  4. نصف كوب عسل اسود
  5. نصف كوب مخلوط سمن وزيت
  6. ملعقة كبيرة قرفة
  7. ملعقة كيبرة بيكنج بودر
  8. ملعقة صغيرة فانيليا
  9. بيضتين

الطريقة:

  1. نضرب السكر مع خليط السمن والزيت حتى يختلط جيدا
  2. نضيف البيض والفانيلياونخلط
  3. ثم نضيف العسل ونخلط ثم نضيف القرفة ونخلط
  4. نخلط البيكنج بودر بالدقيق
  5. نضيف قليل من الدقيق ونخلط ثم نضيف قليل من اللبن ونخلط وهكذا بالتبادل حتى ينتهى المقدار
  6. ندهن صينية بالسمن ونرشها بالدقيق ونصب الخليط بها
  7. وتخبز فى فرن درجة حرارته 160 وطبعا بنكون قمنا بتسخين الفرن اثناء عمل الكيكة

اتمنى ان تقوموا بتجربة هذه الكيكة فهى ظريفه فى الاكل وياريت تخبرونا بالنتائج

اما عن المصدر فانا اكلتها عند صديقة لى


التفاصيل...

الاثنين، 10 نوفمبر 2008

لشعر سهل التسريح

فى الحقيقة الوصفة النهاردة جميلة جدا
تخلصى من تشابك الشعر وصعوبة التسليك بطريقة طبيعية وسهلة وكمان غير مكلفة
اسلقى ليمون وبعدين صفى ماء الليمون بالمصفاة حتى لا يكون به اى شوائب تعلق بالشعر

بعد غسل الشعر بالشامبو ولو بتستعملى بلسم حطيه
وبعد كده اشطفى شعرك بماء الليمون
وبعدين سرحى وشوفى الفرق ......وادعيلى
على فكرة انا حسيت انه فرد الشعر الى حد ما
اما عن المصدر فهى وصفة قديمة عرفتها من اقارب لى

التفاصيل...

الأحد، 2 نوفمبر 2008

بسكوت اليانسون

دى طريقة عمل بسكوت اليانسون والحقيقة هو بسكوت ظريف جدا ويمكن تقديمه مع الشاى
المقادير:
اثنان ونصف كوب دقيق
كوب سكر
ملعقة يانسون
ملعقة صغيرة فانيليا

ملعقة بيكنج بودر
اربع بيضات
ثلث كوب زيت
الطريقة:

  1. يرب البيض جيدا ثم يضاف الية السكر ويضرب الخليط الى ان يغلظ قوامة وتظهر علامة الشريط
  2. تضاف الفانيليا ثم الزيت مع التقليب المستمر حتى يختفى الزيت تماما ثم يضاف اليانسون
  3. تضاف ملعقة البيكنج بودر للدقيق وينخلا معا ثم يضاف الى الخليط السابق مع التقليب بخفة حتى بنتهى المقدار
  4. تدهن صينية او صاج بالزيت دهنا جيدا ثم يصب الخليط ويساوى السطح
  5. يزج فى الفرن حوالى ربع ساعة حتى ينضج
  6. يترك حتى يبرد ثم يقطع اصابع بسمك بوصة ثم يعاد الى الفرن ليحمص قليلا

اما بقى عن المصدر فهو كتاب حلويات بتاع عديلة عزيز


التفاصيل...

السبت، 1 نوفمبر 2008

تخلصى من رائحة الثلاجة الكريهة

النهاردة هاقولكم على طريقة جميلة وسهلة تخلى ريحة الثلاجة جميلة
هنبشر قشر برتقال او ليمون

وبعدين نقطع كيس لمربعات صغيرة يعنى مثلا 2 سم فى 2 سم
ونوزعها فى رفوف الثلاجة والفريزر فى كل رف قطعة
ونضع عليها البشر
وتصبح رائحة الثلاجة برتقال او ليمون
اما بقى عن المصدر فانا قراتها فى منتدى محاورات المصريين

التفاصيل...

الجمعة، 31 أكتوبر 2008

طريقة عمل الكاتشب

النهاردة هنتكلم عن طريقة عمل الكاتشب فى البيت
المقادير:
2 ملعقة كبيرة صلصة
2 ملعقة صغيرة سكر

ربع ملعقة صغرة ملح
خل حسب الحاجة
الطريقة :
نقلب الصلصة مع السكر والملح ثم نضيف خل ونقلب حتى نصل الى السمك المطلوب

اما عن المصدر ماما شافتها فى التليفزيون وقالتلى عليها

التفاصيل...

الأربعاء، 29 أكتوبر 2008

مزيل عرق طبيعى

النهاردة هاقولكم على وصفة جميلة وبسيطة وكمان مش مكلفة
هى مزيل لرائحة العرق بس طبيعى
هنجيب شبه ومسك من عند العطار
الشبه بتبقى قطع كده زى الصخر غير منتظمة يعنى ولونها بيبقى ابيض
اما المسك انا جبته كان بودرة وبيقولو فى بيبقى فصوص بس انا ما شوفتوش بصراحة وبيبقى ابيض برضه

المهم هنطحن الشبة فى المطحنه وكمان المسك لو كان فصوص
ونخلط مقدارين متساويين من المسك والشبة
وبعد الحمام نبدر بيهم
مش بيطلع ريحة عرق خالص حتى لو الواحد قعد 3 أيام ما يستحماش
ملاحظة : انا لما خلطتهم حطيتهم فى علبة كريم وشيلتهم على رف الحمام رطبوا منى مش عارفه من العلبه
ولا عشان فى الحمام والرطوبة
بس برضه استخدمتهم بقيت اخد حته وادعكها فى ايدى زى العجينه وادعك بيها وادى نفس النتيجه
اما عن المصدر فواحده قريبتى هى اللى قالتلى عليها الوصفه دى

التفاصيل...